GALICIA: Dos 828 millóns, NIN UN EURO PARA A ESCOLA PÚBLICA!

No Boletín Oficial do Estado do día 4/08/2021, o Goberno de Pedro Sánchez publicaba o Real Decreto 684/2021 (ver aquí), onde se anuncia unha repartición ás Comunidades Autónomas de 13.486 millóns de euros.

“Amortecer o impacto da crise provocada polo COVID” e responder “ao compromiso do Goberno coa situación financeira das Comunidades Autónomas e Cidades de Ceuta e Melilla, en atención ao relevante papel que estas desempeñan na prestación de servizos públicos fundamentais prestados á cidadanía, tales como a educación, a sanidade e os servizos sociais”, son os eixos fundamentais deste Real Decreto.

Xa que logo, o destino preferente dos 13.486 millóns está claramente determinado: servizos públicos fundamentais. E, entre eles, cítase explícitamente á educación.

Da devandita cantidade, correspóndenlle a Galicia 828 millóns de euros. Unha cantidade que o goberno presidido por Núñez Feijóo, con Román Rodríguez como Conselleiro de Educación e Cultura, recibirá en dous prazos: o 70% en setembro e o 30% en novembro do presente ano.

Pois ben, as peticións formuladas por todos os sectores da comunidade educativa (nais e pais, alumnado, docentes, sindicatos,expertos,…) reclamando un maior investimento en educación que permita dotar de recursos materiais e, sobre todo, humanos, aos centros públicos caen en saco roto. Unha das peticións máis reiteradas é que Núñéz Feijóo e Román Rodríguez manteñan no curso 2021-22 ao profesorado de reforzo contratado no pasado curso 2020-21, pero semella que non será así.

Xa no pasado mes de xuño, Román Rodríguez comentaba que dos 2.300 docentes contratados como reforzo no curso 2020-21, únicamente continuarían 1.250, pouco más do 50% (ver aquí). Namentras, comunidades como Baleares, Cantabria, Cataluña, Navarra, País Vasco ou La Rioja xa comprometían daquela manter ao 100% do profesorado contratado como reforzo.

E agora, xusto antes da reunión coa nova Ministra de Educación e Formación Profesional, Pilar Alegría, o responsable de educación da Xunta de Galicia afirmaba que a súa principal reivindicación sería pedir ao Goberno central máis diñeiro para facer frente aos sobrecustes xerados pola pandemia de COVID no sistema educativo.

En resumen, xa en xuño, Román Rodríguez anunciaba que recortaría o profesorado de reforzo perto do 50%, en agosto o Goberno central anuncia o envío de 828 millóns de euros a Galicia para atender aos servizos esenciais, entre eles educación, e agora segue a dicir que non ten fondos para manter ao profesorado de reforzo.

Pilar Alegría, ministra de Educación e F.P.

Semella máis ben que as ansias por atender ao Sistema Educativo do noso país non figura nas prioridades nin de Núñez Feijóo, presidente da Xunta de Galicia, nin de Román Rodríguez, Conselleiro de Educación e Cultura.

Na Conferencia Sectorial de Educación celebrada o pasado mércores, 25-08-2021, Pilar Alegría (ver aquí) insistía ante os representantes das Comunidades Autónomas “na necesidade de observar as medidas de prevención e hixiene e de manter os reforzos do profesorado para posibilitar a máxima presencialidade en todas as etapas e niveis nun entorno seguro e saudable”.

Outras Comunidades están a responder positivamente ao chamado da ministra, todo da a entender que en Galicia os seus responsables políticos prefiren atender outros intereses.

Grazas por compartilo nas túas redes:

1 Response

  1. 22 Setembro, 2021

    […] para o noso Sistema Educativo, quedando moitas veces ao criterio de cada autonomía (podedes ver aquí un exemplo referido a […]

Deixa unha resposta

O teu enderezo electrónico non se publicará