Hoxe, en contra de todos sectores da comunidade educativa, o consello de ministros do goberno de Rajoy ven de aprobar  como proxecto de ley a LOMCE, a lei WERT.

Tiveron a ben escoller precisamente o día de hoxe, 17 de maio, día das Letras Galegas, día en que miles de persoas desprazámonos a Santiago de Compostela para defender a nosa lingua. 

A LOMCE vén para ser, non a lei da excelencia, senón a lei de “SU EXCELENCIA”. De “su excelencia Rajoy”, de “su excelencia Wert”, de “su excelencia Rouco”, de “su excelencia…”, poñede os nomes que queirades e que reúnan os seguintes requisitos: gustar do rancio nacional-catolicismo, ser fieis adeptos dos movementos “neocon”, grande mérito estar en FAES, predicar a contrarreforma, defender a imposición sobre todas as cousas e amar ao “prójimo” só si pensa o mesmo.

Hoxe é un día de loito para a comunidade educativa e para a escola pública. Hoxe é un día negro para todo o alumnado que non son fillos de “sus excelencias”. Porque a partir de hoxe, e nun trámite parlamentario que o Partido Popular pretende que sexa só iso, un mero trámite, iníciase o camiño de aprobación dunha lei que retrotraerá á nosa escola pública a tempos anteriores ao ano 1970.

Precisamente naquel ano, 1970, Villar Palasí, ministro franquista afín ao Opus Dei, afirmaba que non se podía seguir cunha escola que segregaba a ricos de pobres e que, co sistema de reválidas, só permitía que tres de cada cen alumnos accederan á universidade, vieintisiete ao Bachillerato. Non hai moito colocamos aquí, en escoladeferrado, o NO-DO dese ano, no que se anunciaba a “Ley General de Educación”, lei de Villar Palasí, máis coñecido para Rajoy, Wert e Rouco, como “Villar EL ROJO”.

Non escribo máis, o golpe é duro para toda unha comunidade educativa indignada cun Partido Popular que só sabe e quere gobernar coa vella fórmula de “ordeno y mando”. Un goberno de Rajoy que non ten ningún pudor en aprobar leis orgánicas só cos seus votos (como xa  ocorrera coa LOCE da ministra Pilar del Castillo no ano 2002, en tempos de Aznar). 

Hoxe son días tamén para contrastar e recordar que as leis de educación propiciadas por gobernos socialistas, con todos os fallos, erros e contradicións que puidesen ter, foron aprobadas, tras largos períodos de debate e consenso, cos únicos votos en contra do Partido Popular.

QUEREMOS GALEGO:

Texto de apoio 17M.-

O noso idioma, o galego, é a base fundamental sobre a que nos sustentamos como pobo. Se deixamos que esa base se estrague, todo canto se apoia nela, a nosa esencia como galegos e galegas, abaneará como a terra nun sismo devastador.

Porque non queremos ser estranxeiras na propia patria, atopamos motivos abondo para nos mobilizar este 17M, entre eles:

• Un goberno galego que debería promocionar e proxectar a lingua propia de Galiza, mais que en lugar diso fai xustamente o contrario, levando adiante medidas que só afondan nos retrocesos que o galego está a sofrir. Un goberno que emitiu un Decreto que mingua as posibilidades de uso no ensino a mínimos históricos desde a existencia da Lei de Normalización Lingüística. 
• Un marco xurídico escaso en canto á protección da lingua galega e das persoas que a falan, e que mesmo así é burlado de xeito tan esperpéntico como o acaecido recentemente, cando un xuíz que declara sen vergoña ningunha incumprir a Lei que el mesmo debería facer cumprir, insiste na desvergoña conseguindo que se volva xulgar ao Presidente da Mesa pola Normalización Lingüística e Portavoz de Queremos Galego! por lle ter lembrado que debe respectar a Lei, ademais de facela respectar. 
• Un Estado que abafa, promovendo leis que máis parecen de tempos pasados que do século XXI, leis que insisten en relegar a nosa lingua a un segundo, ou mesmo terceiro plano, facendo máis grande a fenda que separa en canto a dereitos ás persoas galegofalantes das que falan a lingua de Castela. 
• Un día a día no que ben percibimos que o galego non se tén en conta, do mesmo xeito que non se tén en conta que é a lingua propia de Galiza, que falamos miles de persoas, e na que queremos vivir con normalidade. Un último e recente exemplo: agora non podemos viaxar pola AP-9 e ler as sinalizacións das peaxes en galego. O único sinal que na nosa lingua existía foi “traducido” hai escasos días. 

Unha lingua rica e fermosa, unha lingua coa que se pode facer ciencia e cantar, unha lingua na que podemos escribir fermosos versos, libros de matemáticas ou facturas de servizos que empregamos. A nosa lingua. Falémola, amémola, respectémola, defendámola.

“Segregar” no senso de “afastar” ou “separar” é un verbo moi ligado, dende a súa orixe, ao Anteproxecto de Lei Orgánica para a Mellora da Calidade Educativa, nefasta e hipócrita denominación da LOMCE ou, como prefire o ministro, da “Lei WERT”.

“Segregar” é unha das verbas que necesariamente ven acompañando a abrumadora maioría das análises dos múltiples e diversos expertos educativos que teñen empregado parte do seu tempo en escudriñar o que cabe esperar desta proposta do goberno de Rajoy e do seu acólito ministro Wert.

Segregación social, segregación económica, segregación ideolóxica, segregación relixiosa, segregación por sexo, segregación …, segregación …, segregación ….

Sendo tamén que a segunda  das acepcións do verbo “segregar” é a de “producir secrecións”, resulta tan fácil como tentador aplicarlle ao noso sistema educativo público o símil médico e afirmar sen medo a errar que, con Wert e Rajoy, …

… mal cheira a urina do enfermo!

Sí, o día 9 de maio de 2013, será un bo día, un día para recordar que toda a comunidade educativa, nais e pais, docentes, alumnado, expertos,… estivemos dacordo para reclamar a retirada da LOMCE, a retirada da nefasta Lei WERT.

Non recordo unha unanimidade tan grande nos distintos sectores da comunidade educativa que a que ten suscitado WERT e o seu intento de impor “SÍ ou SÍ” un texto legal cuxo único mérito coñecido é o de, precisamente, suscitar un rotundo consenso social en contra.

Deixo aquí o acceso á nova publicada hoxe en infoLibre que, baixo o título “Expertos alertan de que a ley Wert non mellorará o nivel educativo e carrexará máis desigualdade”, desmonta grande parte das tristes argumentacións “wertianas” a favor da lei.

Fágome con grande gusto partícipe de publicitar nas páxinas de escoladeferrado as Xornadas “FERRAMENTAS DE INCLUSIÓN” que, con grande esforzo, dedicación e ilusión organiza a Asociación para a Integración de Personas con Autismo “pordereito“.

Facendo click no cartel das xornadas poderedes acceder a toda a información que precisedes sobre as mesmas. Estas xornadas celebraranse en Pontevedra, no Pazo da Cultura, o sábado 25 de maio de 2013.

O programa resulta, sen dúbida, moi interesante dado o prestixio co que no campo do Autismo e da Inclusión contan tod@s @s ponentes que participan neste encontro.

Parabéns a asociación “pordereito” polo seu traballo e o desexo de que o éxito das xornadas sexa un novo acicate no traballo que acotío desenvolven no eido da educación inclusiva en Galicia.